Ойча наш
Ойча наш, каторы ёсьць у небе, сьвяціся імя Тваё, прыйдзі валадарства Тваё, будзь воля Твая, як на небе, так і на зямлі. Хлеба нашага штодзённага дай нам сёньня, і адпусьці нам грахі нашы, як і мы адпускаем вінаватым нашым; і ня ўводзь нас у спакусу, але збаў нас ад злога.
Малітва Імю Ісусаваму
Госпадзе Ўладару Ісусе Хрысьце, Творча і Божа наш, мы клічам імя сьвятое Тваё і молімся Табе: Ісусе, Сыне ўсячыстае Дзевы Марыі; Ісусе, адзінае і спрадвечнае Слова Бога Айца; Ісусе, супольнасьць і любоў Духа Сьвятога; Ісусе, творча анельскай прыроды; Ісусе, Збавіцелю роду людзкога; Ісусе, праганіцелю бесаўства ўсякага: Ісусе, зьмілуйся нада мною ў вялікай міласэрнасьці Тваёй; Ісусе, ачысьці беззаконьне маё ў бязьмежнай дабраце Тваёй; Ісусе, адпусьці грахі мае; Ісусе, прымі гэтыя малітвы мае: О, салодкі Ісусе! О, любы Ісусе! О, ціхі Ісусе! Табе славу аддаем разам з Айцом і Ўсесьвятым Духам на вякі вякоў. Амін.
Багародзіца Дзева, радуйся!
Багародзіца Дзева, радуйся, поўная ласкі Марыя, Госпад з табою, блаславёная ты між жанчын і блаславёны плод улоньня Твайго, бо Ты нарадзіла Збавіцеля душ нашых.
Дастойна ёсьць сапраўды называць шчасліваю Цябе, Багародзіцу, вечна блаславёную і беззаганную Маці Бога нашага. Больш годную пашаны за хэрувімаў і без параўнаньня больш слаўную за сэрафімаў, што захаваўшы дзявоцтва, радзіла Бога-Слова, існую Багародзіцу, цябе мы ўзвялічваем.
Пад Тваю міласэрнасьць прыбягаем, Багародзіца Дзева, маленьняў нашых у час суму не адкінь, але ад бедаў вызваль нас, адзіная чыстая, адзіная блаславёная.
Дай нам горача маліцца за нашу краіну там, дзе мы ёсць: на вуліцы, у цэрквах, на працы і ў дамах!
Барані нас, Божа, ад хлусні і крыўды, дай нам духа еднасьці, моцы і любові!
Мы, слугі Твае, сёння аддаем Табе славу, падзяку і пакланенне і просім Цябе глянуць ласкава на ўсіх верных сыноў і дачок беларускага народу, якія нявінна церпяць пераслед, здзекі, знявагі, зняволенне і выгнанне за тое, што любяць свой народ і жадаюць яму лепшай долі і пашаны ягонай годнасці.
Дай, каб іхнія цярпенні і ахвяры не былі дарэмнымі, але, як тое зерне, што ўпала ў зямлю, прынеслі багаты плён справядлівага міру, свабоды і шчаслівай будучыні для беларускага народу і ўсяго свету.
Ойча наш Нябесны, беражы нашу краіну ад зла, беззаконня, войнаў і хвароб.
Верым у Тваё Валадарства і просім аб спаўненні Тваёй Святой волі на нашай любай Беларусі!
Бо Ты, Божа наш, Той, хто мілуе і збаўляе, і мы Табе славу аддаем, Айцу, і Сыну, і Святому Духу, цяпер і заўсёды, і на вякі вякоў. Амін.
Малітвы за сьвятароў
Госпадзе Ісусе Хрысьце, Пастыру ўсіх верных, пакорна малю Цябе, глянь ласкава на Сьвятога Айцы (імя), Папу Рымскага. Блаславі ягоныя высілкі і споўні ўсе ягоныя жаданьні для дабра Тваёй Царквы. Дай яму сілу і здароўе, каб у супакоі ён мог кіраваць даручаным яму статкам і весьці яго да нябеснага валадарства. Амін.
Успомні, Госпадзе, нашага біскупа (імя), і ўсіх біскупаў, і пашлі ім Тваё блаславеньне, каб сваім навучаньнем і прыкладам яны маглі накіроўваць нас да Цябе. Амін.
Блаславі, Госпадзе, нашага сьвятара, айца (імя), і ўсіх сьвятароў, і захавай іх у бяспецы. Дай ім дух разважнасьці, пакоры, цярплівасьці і вытрываласьці ў працы на Тваю славу і для збаўленьня душаў, якія Ты выбавіў Тваёй пачэснай крывёю. Запалі ў іхніх сэрцах сьвяты агонь, які гарэў у сэрцах Тваіх апосталаў, каб яны заўсёды ўва ўсім шукалі Тваёй хвалы і заахвочвалі нас усё больш любіць Цябе. Хай іхняя жыццё будзе сьвятым, згодна з праўдай, якую яны прапаведуюць. Хай яны будуць сьвятарамі паводле Твайго сэрца, і хай сьвятло іхняе сьвеціць усім, каб людзі, бачачы іхнія добрыя ўчынкі, уславілі Айца нашага нябеснага. Амін.
Малітва за бацькоў
Усядобры Госпадзе Божа, ты загадаў нам шанаваць бацьку і маці і ў Тваім жыцьці на зямлі даў усім прыклад паслушэнства. Прашу Цябе пакорна: пачуй маю просьбу і будзь спагадлівым да маіх бацькоў. Ахоўвай іх ад усялскай нягоды, небясьпекі, хваробы. Дай ім здароўе і пашлі ім багацьце Тваёй ласкі. Зьмілуйся над імі ў вялікай міласэрнасьці Тваёй, каб яны верна служылі Табе, а праз іх і я аказаўся годным славіць Цябе і служыць Табе. Амін.
Малітва за хворага
Ойча сьвяты, Лекару душаў і целаў, Ты паслаў Твайго адзінароднага Сына, Госпада нашага Ісуса Хрыста, для аздараўленьня кожнай хворасьці і вызваленьня ад сьмерці. Ацалі слугу Твайго (Тваю) … ад усіх душэўных і цялесных немачаў, якія апанаваіл яго (яе). Верні яму (ёй) здароўе, ласкаю Хрыста Твайго, малітвамі Найсьвяцейшай Уладаркі нашай Багародзіцы і Заўсёды Дзевы Марыі, і ўсіх сьвятых. бо Ты Бог наш, крыніца збаўленьня, і мы Табе славу аддаем разам з адзінародным Сынам Тваім і з усесьвятым, добрым і жыватворчым Тваім Духам, цяпер і заўсёды, і на вякі вякоў. Амін.
Малітва аб блаславеньні
Госпадзе Сьвяты, што жывеш на вышынях і ўсябачным вокам пазіраеш на ўсякае стварэньне, вось мы схіляем перад Табою галовы і молімся Табе, Сьвяты Сьвятых, працягні Тваю нябачную руку са сьвятога Твайго нябеснага пасаду і блаславі ўсіх нас. І калі мы ў чым зграшылі сьвядома ці несьвядома, ты, як добры і чалавекалюбны Бог, прабач нам, і дай нам Твае зямныя і нябесныя багацьці. Бо Ты, Божа наш, Той, хто мілуе і збаўляе нас, і мы Табе славу аддаем, Айцу і Сыну, і Сьвятому Духу, цяпер і заўсёды, і на вякі вякоў. Амін.
Малітва да анёла апекуна
Спрадвечны Божа ўсемагутны, Ты стварыў духі пасланцамі сваімі, і слугамі сваімі полымя агоню, і даў ім месца на вышыні, каб заўсёды бачылі Твой твар. Будучы Духам, Ты хацеў ад духаў мець пахвалу; Будучы Любоўю, Ты хацеў адчуць любоў ад іншых істотаў. Але шатан непакорлівы не захацеў аддаць пашану Табе, Тварцу свайму; загарэўшыся гордасьцю – ён і тыя, што да яго далучыліся, – ён зажадаў мець свой пасад паўночны. Яго бачыў Ты, Хрысьце, як ён, быццам маланка, з неба зьляцеў. Пасьля Ты стварыў жывёлы цялесныя неразумныя на зямлі, у моры і ў паветры, каб магла быць пазнаная Твая бязьмежная мудрасьць і невыказная дабрата. У канцы Ты стварыў чалавека на свой вобраз і падабенства, каб заняў месца шатана, які адпаў: душою падобнага да анёлаў, а целам да жывёлаў. Ты ўчыніў яго мала меншым за анёлаў, славаю і пашанаю вянчаў. Ты даў яму ўладу над усімі зьвярамі, рыбамі і птушкамі, і да гэтага анёлам сваім загадаў, каб заўжды сьцераглі яго, як Ты сам гаварыў Майсею слузе Твайму: “Вось Я пасылаю анёла майго, ён пойдзе перад Табою, будзе ахоўваць цябе ў дарозе, і давядзе да месца, якое Я прыгатаваў табе; трымайся яго і слухай ягонага голасу, не пагардзі ім: не адпусьціцца табе, калі зграшыш, бо імя Маё у ім”. Госпадзе Ўладару і Творча ўсякага стварэньня, дзеля такіх вялікіх і невыказных дабротаў, якія Ты ўчыніў роду людзкому, недастойныя малітвы нашы прымі, і як Ты сам загадаў мець у пашане анёла свайго, успамажы нас вялікай ласкаю Тваёю, каб нам ані словам, ані ўчынкам, ані думкаю не супраціўляцца сьвятой волі Тваёй і ахоўніку душ нашых і целаў; адпусьці нам грахі нашы, дай жаль сардэчны за беззаконьні нашы; бо анёлы Твае цешацца вельмі дзеля аднаго грэшніка, які пакаяўся. Цябе ж, сьветлы анёле, апекуне мой, прашу: прымі ад мяне гэтую малітву, захавай і навучы мяне, і папраў ва ўсіх учынках маіх. Бо ты, што сьцеражэш душу маю і цела, заўсёды бачыш твар Бога: дык малі Яго, каб Ён увёў мяне ў валадарства сваё разам з табою на вякі. Амін.
Малітвы за жывых
Збаў, Госпадзе, бацькоў маіх … і …, братоў і сёстраў, і ўсіх блізкіх, і ласку Тваю, супакой, радасьць і дабро дай ім.
Збаў, Госпадзе, сіротаў, удоваў, бедных, хворых, тых што церпяць бяду і нястачу.
Збаў, Госпадзе, тых, што церпяць перасьлед і зьняволеньне за Цябе і за веру сьвятую; наведай іх, умацуй, суцеш, і хутка сілаю Тваёю палёгку, свабоду і вызваленьне дай ім.
Збаў, Госпадзе, прыяцеляў маіх і дабрачынцаў, і ўсіх, што прасілі мяне, нягоднага, маліцца за іх.
Збаў Госпадзе, тых, што ненавідзяць і крыўдзяць мяне, і нападаюць на мяне без падставы, і ня дай ім згінуць з прычыны мяне, грэшнага.
Усіх, што ад веры сьвятой адступілі, прасьвятлі сьвятлом Твайго пазнаньня, і зьяднай з Тваёй сьвятой, паўсюднай і апостальскай Царквой.
Малітвы за памерлых
Успомні, Госпадзе, душы памерлых у надзеі ўваскрасеньня і жыцьця вечнага слугаў Тваіх, бацькоў маіх … і …, і ўсіх родных, прабач ім усе правіны вольныя і міжвольныя, даруй ім валадарства нябеснае і зрабі іх удзельнікамі Твайго бясконцага і блаславёнага жыцьця.
Дай, Госпадзе, адпушчэньне грахоў усім, што раней адышлі ў надзеі ўваскрасеньня і жыцьця вечнага, айцом, братом і сёстрам нашым, і ўчыні ім вечную памяць.